Мазаіка "Кастрычнік"
«Мяне адгаворвалі, пераконвалі, што Юбілейная плошча, на якой размешчаны будынак, не падрыхтавана для пано. Але я памятаў, у якіх дрэнных інтэр'ерах пісалі свае фрэскі старыя майстры. Аб сінтэзе мастацтваў у нас напісаны тамы, а практычна зроблена мала. І я вырашыў рабіць. Але манументальная рэч, як сцэна ў тэатры, павінна працаваць усёй архітэктурнай прасторай. І я ішоў ад глыбіні, ад прасторы - хай нават не падрыхтаванай плошчы. Таму ў мазаіцы такі складаны падвойны рух, такая глыбіня», — так Аляксандр Кішчанка, апісваў працу над эскізам пано. Выканаўцам быў мастак Валерый Даўгала, ён перамалёўваў эскіз на кардоны ў натуральную велічыню. Мазаіка выкладвалася дывановым метадам, гэта значыць адразу ж працавалі з усім пляцам аб'екта.
